Familienpolitik

Lieber Papa!

Ich schreib dar heint a „Briaf - Gedicht“,
des erste hab ich zrissn;
mir fehlt da d`Harmonie dazua -
Warum? Des wirst scho wissen!

Mei Mama will’s net, dass ich schreib,
doh heint möchte ich ihr trutzn.
Ich bin jetzt grad alloa dahoam -
des Zeitl möchte ich nutzn.

Mei Lebm besteht fast nur aus Fragn.
Vo viel hab ich koan Schimmer.
Mir zwoa habm uns scho lang net gsehgn -
du kennast mih gwiß nimmer.

Du, d’ Mama sagt, ich siahg Dar gleih -
Dei Gangart - d’ Augn - Dei Wesn;
doh, schau ich ihr ins Gsicht beim Redn,
kann ich koa Liab drinn lesn.

Geh’, schick mar doh a Bild vo Dir –
Des gfreiat mih unbändi!
Wann’s guat geht, und wann ‚s Zeignis stimmt,
dann kriag ich heu’r a Handy.

Dann kann ich endlih redn mit Dir –
und is’s ah nur im Gheima.
Mir hättn uns sicher gnua zan sagn –
Und viel wurdt sih dann reima.

Du –ih muaß mitn Schreibm aufhörn –
mei Mama is grad kemma.
„ Alls Guate zu Dein Vatertag!“ –
Des laß ich mar net nehma!


Hans Ratzesberger (Stelzhamerbund)